ჯეიმს აპატურაი: თუ საქართველოს MAP-ს მივცემთ, არ ვიცი, რას გააკეთებს რუსეთი

„ჩემი კოლეგები ამბობენ, რომ თუ MAP-ს მივცემთ ან არ მივცემთ საქართველოს, რუსეთი საპასუხო რეაგირებას მაინც განახორციელებს, მე კი არ ვიცი, რას გააკეთებს რუსეთი“,-ამის შესახებ ჩრდილოატლანტიკური ალიანსის გენერალური მდივნის სპეციალურმა წარმომადგენელმა სამხრეთ კავკასიასა და ცენტრალურ აზიაში ჯეიმს აპატურაიმ “რუსთავი 2”-თან საუბრისას განაცხადა.

როგორც აპატურაიმ განმარტა, ნატო მხოლოდ საქართველოს პროგრესის და ბუქარესტის სამიტზე მიღებული გადაწყვეტილებების გათვალისწინებით მიიღებს.

„უელსის სამიტის ერთ-ერთი შემადგენელი იქნება თანამშრომლობის განმტკიცება, შეგიძლიათ, ამას უწოდოთ პაკეტიც. ყველაზე მნიშვნელოვანი არის ის, რომ ვაპირებთ ვაღიაროთ თქვენი ქვეყნის წვლილი და პროგრესი, რომელსაც საქართველო ნატო-სკენ მიმავალ გზაზე ახორციელებს.

რაც შეეხება რუსეთის ფაქტორს, მას საკუთარი განრიგი აქვს. ის, რაც 2008 წელს მოხდა, ნამდვილად უკავშირდებოდა ბუქარესტის გადაწყვეტილებას. ჩემი ზოგიერთი კოლეგა ამბობს, რომ თუ MAP-ს მივცემთ ან არ მივცემთ საქართველოს, რუსეთი საპასუხო რეაქციას ორივე შემთხვევაში განახორციელებს. მე კი არ ვიცი, რას იზამს რუსეთი. ჩვენ ყველა გადაწყვეტილებას მივიღებთ მხოლოდ საქართველოს პროგრესის გათვალისწინებით და ბუქარესტის გადაწყვეტილებების მიხედვით”,-განაცხადა აპატურაიმ.

ცნობისათვის, ნატო-ს სამიტი მიმდინარე წლის სექტემბერში, უელსში გაიმართება.