რუსთავის მერი დავით ჯიქია ,,თვითმმართველობების ეროვნული ასოციაციის'' პრეზიდენტად აირჩიეს

დღეს თბილისში, სასტუმრო ,,შერატონში“ ,,თვითმმართველობების ეროვნული ასოციაციის“ მე-3 ასამბლეა ჩატარდა. ასოციაციის პრეზიდენტად ასამბლეამ რუსთავის მერი დავით ჯიქია აირჩია. დღესვე დამტკიცდა ასოციაციის პრეზიდენტის მიერ წარმოდგენილი აღმასრულებელი საბჭოს წარმომადგენლობითი სიაც 23 წევრის შემადგენლობით.  ..თვითმმართველობის ეროვნული ასოციაციის პრეზიდენტობა საკმაოდ დიდ ნდობად და სერიოზულ გამოწვევად მიმაჩნია, რისთვისაც კიდევ ერთხელ ვუხდი მადლობას აქ მყოფ საზოგადოებას. ჩემთვის როგორც რუსთავის მოქმედი მერისთვის ცნობილია ყველა იმ პრობლემის შესახებ, რომელიც დღეს დგას თვითმმართველობების წინაშე. საბედნიეროდ, თვითმმართველობის ახალი კოდექსი საკმაოდ დიდ შანსს იძლევა იმისთვის, რომ სწორი კოორდინაციის პირობებში რეალური თვითმმართველობების შექმნა შევძლოთ და ,,თვითმმართველობის ეროვნული ასოციაცია“ იქნება სწორედ ის ორგანიზაცია, რომელიც უმთავრეს წვლილს შეიტანს ამ საქმეში,’’ - განაცხადა დავით ჯიქიამ.

,,საქართველოს თვითმმართველობების ეროვნული ასოციაცია“ 2004 წლის 17 დეკემბერს ევროპის საბჭოსა და ევროკომისიის ერთობლივი ინიციატივის ფარგლებში დაარსდა. ასოციაცია არაერთ საერთაშორისო ორგანიზაციასთან თანამშრომლობს და წარმოადგენს საქართველოს მთავრობის პარტნიორს ევროპის საბჭოს ადგილობრივ და რეგიონულ ხელისუფლებათა კონგრესის თვითმმართველობათა პალატაში დელეგაციის წარდგენისას.