„ყოფილი მაღალჩინოსნების სამართლებრივი დევნა უნდა მოხდეს იქ, სადაც მტკიცებულებები არსებობს“

საქართველოს პრეზიდენტის გიორგი მარგველაშვილის მიერ ყოფილი მაღალჩინოსნების სამართლებრივ დევნასთან დაკავშირებულ განცხადებებზე საქართველოს იუსტიციის მინისტრმა თეა წულუკიანმა კომენტარი გააკეთა. როგორც მინისტრმა განაცხადა, ყოფილი მაღალჩინოსნების სამართლებრივი დევნა უნდა მოხდეს იქ, სადაც მტკიცებულებები არსებობს. წულუკიანის თქმითვე, მას სჯერა იმ მოსამართლეების, რომლებიც სასამართლო დარბაზში სააკაშვილის თუ სხვების საქმეს განიხილავენ.

“მე ვფიქრობ, ყოფილი მაღალჩინოსნების, შუა რგოლის მენეჯმენტის, რომელიც ყოფილ მთავრობას ემსახურებოდა, სამართლებრივი დევნა უნდა მოხდეს იქ, სადაც არსებობს მტკიცებულებები, ხოლო მოსამართლე დამოუკიდებელია. პროცესი არის გამჭვირვალე იმ რეფორმების წყალობით, რომელიც ჩვენმა მთავრობამ იუსტიციის სამინისტროს მეთაურობით შარშან ჩაატარა და წელსაც მიმდინარეობს. მე მჯერა იმ მოსამართლეების, რომლებიც სასამართლო დარბაზში განიხილავენ სააკაშვილის თუ სხვების საქმეს. აქედან გამომდინარე, მე, როგორც იუსტიციის მინისტრს, არ შეიძლება მაწუხებდეს, რომ ამ ქვეყაში კანონის წინაშე ყველა თანაბარია, პირიქით”, – აღნიშნა თეა წულუკიანმა.