აჭარაში კერძო ინვესტიციების მოცულობა იზრდება

აჭარაში ინვესტიციების მოცულობა 24,2 %-ით გაიზარდა. აჭარის ფინანსთა და ეკონომიკის სამინისტროს ინფორმაციით, 2014 წლის პირველ ნახევარში აჭარაში 114,4 მლნ დოლარის კერძო პირდაპირი ინვესტიცია განხორციელდა; 2013 წლის ანალოგიურ პერიოდში კი რეგიონში სულ 92,1 მლნ დოლარის კერძო პირდაპირი ინვესტიციაა განხორციელებული.

წლის იანვარ-ივნისში რეგიონში ყველაზე მეტი ინვესტიცია 41,1%-ი ტურიზმის სექტორში ჩაიდო.

ტურიზმის შემდეგ ინვესტორებისთვის მიმზიდველი მშენებლობის სექტორია, რომელზეც 2014 წლის პირველ ნახევარში ინვესტიციების 38,5% მოდის. უწყების ინფორმაციით, 2014 წლის ექვს თვეში ინვესტიციების 14,5% ენერგეტიკის სექტორზე, სოფლის მეურნეობაზე - 1%, მრეწველობაზე – 0,5% მოდის.

სტატისტიკური ინფორმაციით, ეკონომიკის სხვა სექტორებზე კერძო ინვესტიციების 4,4%–ია განაწილებული.

წყარო:  www.bpi.ge