„კაზანტიპზე“ შესაძლოა, აფხაზი ახალგაზრდები ჩამოვიდნენ

აფხაზეთიდან ანაკლიაში, „კაზანტიპის“ ფესტივალზე დასასწრებად შესაძლოა ახალგაზრდები ჩამოვიდნენ. ამის შესახებ „კავკაზსკი უზელის“ ჟურნალისტმა ბესლან კმუზოვმა განაცხადა, რომელიც 10 წლის განმავლობაში მუშაობდა აფხაზეთში, ამჟამად კი თბილისში ცხოვრობს და თვითგამოცხადებულ რესპუბლიკაში მიმდინარე მოვლენებს აშუქებს.

მისი თქმით, აფხაზეთში შექმნილი განუკითხაობის, უმუშევრობისა და რუსეთიდან მიღებული „მუქთა ფულის“ გამო აფხაზი ახალგაზრდები მასობრივად მოიხმარენ ნარკოტიკებს და შესაძლოა, სწორედ ეს იყოს „კაზანტიპით“ მათი დაინტერესების ძირითადი მიზეზი.

ჟურნალისტის თქმით, „საზღვრის“ გადაკვეთისთვის თანხის გაღებისა და „კაზანტიპზე“ დასწრების ფინანსური შესაძლებლობა მაღალჩინოსანთა შვილებს აქვთ, თუმცა არც საშუალო შემოსავლების აფხაზები იტყვიან უარს შანსზე, დრო ელექტრონული მუსიკის ფესტივალზე გაატარონ.

კმუზოვი დარწმუნებულია, რომ „კაზანტიპზე,“ ისევე როგორც ნებისმიერ კლუბში, ნარკოტიკების, თუნდაც მსუბუქი საშუალებების მოხმარება მოხდება, პოლიცია კი მხოლოდ ღონისძიების პერიმეტრს გააკონტროლებს.

ჟურნალისტის თქმით, აფხაზებს „საზღვარზე“ სოლიდური ქრთამის გაცემა მოუწევთ, რადგან არჩევნების წინ პროცედურები განსაკუთრებით გამკაცრებული იქნება. თუმცა, ზოგადად, ის მიესალმება მსგავს ღონისძიებებში აფხაზი ახალგაზრდების ჩართვას, რადგან ფიქრობს, რომ ქართველებისა და აფხაზების ურთიერთობებს ეს მხოლოდ წაადგება.

„ეს, ცხადია, პოზიტიური ასპექტია, თუმცა კარგი იქნება, თუ სხვა ფესტივალებიც ჩატარდება, რომლებიც აფხაზ ახალგაზრდებს დააინტერესებს. ვნახოთ, ვინ ჩამოვა „კაზანტიპზე“ აფხაზეთიდან. ალბათ ეს ცნობილი გახდება. მათ ჩამოსვლა რუსული პასპორტებით მოუწევთ და „რესპუბლიკის“ ტერიტორიაზე შესვლაც მათთვის პრობლემა არ იქნება,“ – აცხადებს კმუზოვი.

წყარო: www.commersant.ge