დავით ნარმანია დედაქალაქის მერის უფლებასმოსილების განხორციელებას შეუდგა

თბილისის მერი დავით ნარმანია მერიაში უკვე მივიდა და უფლებასმოსილების განხორციელებას შეუდგა.დავით ნარმანია მერიაში საკრებულოს თავმჯდომარე გია ალიბეგაშვილთან ერთად მივიდა. დავით ნარმანიამ სამუშაო კაბინეტში უკვე მიიტანა რამდენიმე პირადი ნივთი, მათ შორის - წიგნები თბილისის შესახებ.

"დარწმუნებული ვარ, რომ აქტიურად ვიმუშავებთ და ნდობა, რაც ამომრჩევლისგან გვაქვს, გავამართლებთ. ჩვენ 24-საათიან სამუშაო რეჟიმში ვიქნებით მომდევნო კვირიდან, მას შემდეგ, რაც თბილისის საკრებულო დაამტკიცებს მთავრობის შემადგენლობას. ძალიან საინტერესო გუნდია; წესიერი, მიზანმიმართული, გამოცდილი და მშრომელი ადამიანები არიან. ისინი დღე და ღამე იქნებიან ჩემთან, რათა თბილისი უფრო მოწესრიგებული მიმზიდველი და კომფორტული ქალაქი გავხადოთ", - განაცხადა დავით ნარმანიამ.

მთავრობის შემადგენლობას ნარმანია 14:00 საათზე დაასახელებს. ახალი შემადგენლობა ჯერ არ სახელდება, თუმცა როგორც "ინტერპრესნიუსს" ნარმანიამ განუცხადა, მის შემადგენლობაში არც ერთი ძველი სახე არ იქნება.