„რუსთავფარმა“ თანამედროვე სტანდარტების სასათბურე კომპლექსს ააშენებს

თბილისი  - რუსთავის გზატკეცილზე თანამედროვე სტანდარტების სასათბურე კომპლექსი აშენდება.

ამ მიზნით მთავრობამ კომპანია „რუსთავფარმას“ რუსთავის გზატკეცილზე, მე-17 კმ-ზე მდებარე 135782.00 კვ.მ არასასოფლო-სამეურნეო დანიშნულების მიწის ნაკვეთი და მასზე განთავსებული შენობა-ნაგებობები პირდაპირი მიყიდვის ფორმით, 300 000 ლარად მიყიდა.

საპრივატიზებო პირობებით, „რუსთავფარმამ“ საპრივატიზებო თანხა ხელშეკრულების გაფორმებიდან 30 დღეში უნდა გადაიხადოს. კომპანია ასევე ვალდებულია ტერიტორიაზე ან მის ნაწილზე პირადად ან/და მესამე პირის მეშვეობით სათბურების კომპლექსი ააშენოს. პროექტის განხორციელება „რუსთავფარმამ“ 24 თვეში უნდა უზრუნველყოს.

საპრივატიზაციო პირობების მიხედვით, ინვესტორმა პროექტში 8,2 მლნ ლარის ინვესტიცია უნდა განახორციელოს და ვალდებულების შესრულებიდან 1  თვეში არანაკლებ 170 ადამიანი დაასაქმოს.

წყარო: www.bpi.ge