მიხეილ სააკაშვილი უკრაინაში ქართველ „კანონიერ ქურდებს“ შეხვდა

საქართველოს ყოფილი პრეზიდენტი მიხეილ სააკაშვილი, უკრაინაში ორ ქართველ გავლენიან კანონიერ ქურდს შეხვდა.

ინფორმაციას ამის შესახებ გაზეთი „ასავალ-დასავალი“ დღევანდელ ნომერში, საკუთარ წყაროზე დაყრდნობით წერს.

გამოცემის ინფორმაციით, სააკაშვილის „კანონიერ ქურდებთან“ შეხვედრის ორგანიზება, უკრაინაში საქართველოს ყოფილმა ელჩმა გრიგოლ ქათამაძემ გააკეთა.

„კრიმინალურ ავტორიტეტებს სააკაშვილმა აღუთქვა, რომ მათი თანადგომა დაფასდებოდა და მისი ხელისუფლებაში დაბრუნების შემთხვევაში, მათ პრივილეგიებს მიანიჭებდა.

გეგმა კი ძალიან მარტივია: საზღვარგარეთ მყოფმა ქართველმა „კანონიერმა ქურდებმა“ მათი გავლენის ქვეშ მყოფი პირების მეშვეობით, საქართველოში კრიმინოგენული ვითარების დაძაბვა უნდა მოახერხონ, უნდა გახშირდეს ყაჩაღობა, მკვლელობები, დაჭრები, ქურდული გარჩევები და რეკეტი.

რაც მთავარია, სიტუაციის ესკალაცია უნდა მოხდეს ციხეშიც, გაძლიერდეს „მაყურებლის ინსტიტუტი“, შეუქცევადი ხასიათი უნდა მიეცეს ციხის შიგნით აზარტულ თამაშებს და უნდა მოხდეს „ზონების გაშავება“.

ერთი სიტყვით, როგორც ციხეში, ასევე გარეთ, კრიმინოგენული ფონი უნდა დაიძაბოს და ქუჩებში უმართავი სიტუაცია შეიქმნას.

აი, სწორედ ამაში ხედავს სააკაშვილი ხელისუფლების წინააღმდეგ მოსახლეობის აბუნტების, რევოლუციური ფონის შექმნისა და ხელისუფლებაში დაბრუნების ერთ-ერთ უმოკლეს გზას“ - წერს გამოცემა.