ხელისუფლება ინვესტორებთან კიდევ ერთ დათმობაზე მიდის და მათ ეკონომიკურ ამნისტიას სთავაზობს. მთლიანობაში სახელმწიფომ ინვესტორებს, 2012 წლიდან დღემდე, 10 მლნ ლარსა და 347 მლნ დოლარზე მეტი აპატია.
სსიპ „სახელმწიფო ქონების ეროვნული სააგენტოს“ ინფორმაციით, ინვესტორებს 2014 წლის 1 იანვრამდე ხელშეკრულებებით ნაკისრი ვალდებულებების შესრულების შესახებ ინფორმაციის არ მიწოდებით დაკისრებული პირგასამტეხლო აპატია. ასევე პატიებას დაექვემდებარა გადაცემული ქონების დაზღვევის, ან კომუნალური გადასახადების გადახდის ვალდებულების შეუსრულებლობით დაკისრებული პირგასამტეხლო.
„საინვესტიციო გარემოს გაუმჯობესებისა და ინვესტორების ხელშეწყობის მიზნით, ეკონომიკისა და მდგრადი განვითარების სამინისტროსა და სსიპ „სახელმწიფო ქონების ეროვნული სააგენტო“-ს ინიცირებით, „სახელმწიფო ქონების შესახებ საქართველოს კანონში“ შესული ცვლილებებით სახელმწიფო ქონების შემძენთა და მართვის უფლებით მიმღებ პირებს ეპატია შესაბამისი ხელშეკრულებებით ნაკისრი ვალდებულებების შესრულების შესახებ ინფორმაციის არ მიწოდებით დაკისრებულ პირგასამტეხლო 2014 წლის 1 იანვრამდე. ასევე, სახელმწიფო ქონების უზუფრუქტუარს ეპატია ხელშეკრულებით ნაკისრი, გადაცემული ქონების დაზღვევის, ან კომუნალური გადასახადების გადახდის ვალდებულების შეუსრულებლობით დაკისრებული პირგასამტეხლო 2014 წლის 1 იანვრამდე“, - ნათქვამია „სახელმწიფო ქონების ეროვნული სააგენტოს“ განცხადებაში.
იქვე მითითებულია, რომ ეს გადაწყვეტილება ინვესტორებს შესაძლებლობლობას მისცემს, პირგასამტეხლოს სახით გადასახდელი თანხა უშუალოდ საინვესტიციო პროექტების სამომავლო განვითარებას მოახმარონ.
BPI.ge–ს ინფორმაცია
No comments:
Post a Comment